TV Licensing

View in English

Gallwch wneud cais am Drwydded Deledu am ddim:

• Os ydych chi, fel deiliad y drwydded, dros 75 oed
  AC
• Os ydych chi, neu eich partner sy’n byw yn yr un cyfeiriad, yn derbyn Credyd Pensiwn.

Yn derbyn Credyd Pensiwn? Dysgwch sut i gael Trwydded Deledu am ddim

Oes gennych Drwydded Deledu yn barod?

Os oes gennych Drwydded Deledu yn barod, mewngofnodwch i wneud cais am eich Trwydded Deledu am ddim ar-lein.

Fel rhan o’ch cais, byddwn yn gwirio gyda’r Adran Gwaith a Phensiynau i wneud yn siŵr eich bod yn derbyn Credyd Pensiwn. Gwnewch yn siŵr bod yr enw ar y Drwydded Deledu yr un fath â’r enw sydd gan yr Adran Gwaith a Phensiynau.

Ddim yn meddu ar Drwydded Deledu gyfredol?

Os ydych chi’n credu eich bod yn gymwys i gael trwydded am ddim ond nad oes gennych Drwydded Deledu gyfredol neu nad ydych yn gallu mewngofnodi, mae’n dal yn bosib i chi wneud cais ar-lein.

Gwneud cais am Drwydded Deledu am ddim ar lein cyn i chi gyrraedd 75 oed

Os ydych eisoes yn derbyn Credyd Pensiwn, gallwch wneud cais am eich trwydded am ddim pan fyddwch yn 74 oed. Byddwn yn diweddaru eich taliadau i’ch trwyddedu hyd at eich pen-blwydd yn 75, ac yna byddwch wedi’ch trwyddedu gan eich trwydded am ddim. Byddwn yn ysgrifennu i gadarnhau hyn.

Os ydych chi’n ddall (amhariad difrifol ar eich golwg) ac yn gallu darparu’r dystiolaeth briodol, rydych chi’n gymwys i wneud cais am gonsesiwn 50%. Ar ôl i’ch cais gael ei dderbyn, gallwch wedyn wneud cais am Drwydded Deledu am ddim.

Ddim yn gymwys i gael Trwydded Deledu am ddim? Adnewyddwch neu talwch am eich Trwydded Deledu

Yn talu am Drwydded Deledu ar hyn o bryd?

Fe ddylech barhau i wneud eich taliadau i barhau i fod wedi’ch trwyddedu. Os bydd angen, gallwch adnewyddu eich trwydded ar lein.

Ddim wedi’ch trwyddedu?

Os oes angen Trwydded Deledu arnoch ac nad ydych yn talu am un ar hyn o bryd, prynwch drwydded nawr.

Ddim ar Gredyd Pensiwn ond yn meddwl y gallech fod yn gymwys?

Os nad ydych yn derbyn Credyd Pensiwn ond yn meddwl y gallech fod yn gymwys, mae’n werth holi.

• Mae Credyd Pensiwn yn ychwanegu at eich incwm ymddeol
• Ar gyfartaledd mae taliadau Credyd Pensiwn dros £67 yr wythnos†
• Fe allech fod yn gymwys hyd yn oed os oes gennych bensiwn, cynilion neu’n berchen ar eich cartref
• Nid yn unig mae’n gadael i chi hawlio Trwydded Deledu am ddim, ond gall helpu hefyd gyda:

– costau tai,
– biliau gwresogi,
– treth cyngor,
– gofal deintyddol ar y GIG,
– a mwy.

Mae’n hawdd gweld a allwch gael Credyd Pensiwn. Ffoniwch yr Adran Gwaith a Phensiynau ar 0800 99 1234 (oriau agor 8.00am - 6.00pm) neu ewch i gov.uk/credyd-pensiwn.

Os ydych yn byw yng Ngogledd Iwerddon, ffoniwch Ganolfan Bensiynau Gogledd Iwerddon ar 0808 100 6165. Neu ewch i nidirect.gov.uk/pension-credit.

Sylwch, ni all Trwyddedu Teledu roi cyngor ynghylch bod yn gymwys ar gyfer Credyd Pensiwn.

Ad-daliadau

Os buoch yn talu am Drwydded Deledu pan oeddech yn gymwys i gael un am ddim, fe allech fod yn gymwys i gael ad-daliad. Byddwn yn prosesu hyn fel rhan o’ch cais.

A yw eich amgylchiadau wedi newid?

Os yw deiliad y drwydded wedi marw

Ffoniwch 0300 790 6042* i roi gwybod i bwy y dylem drosglwyddo’r drwydded. Os ydych yn byw yn yr un cyfeiriad, fe fyddwch wedi’ch trwyddedu nes bydd y drwydded bresennol yn dod i ben.

Os ydych yn gymwys, gallwch wedyn wneud cais am Drwydded Deledu am ddim newydd. Os ddim, bydd angen i chi brynu trwydded newydd pan ddaw’r un bresennol i ben.

Mwy o gymorth a chyngor am beth i’w wneud os bydd deiliad y drwydded yn marw.

Os ydych wedi symud tŷ

Gallwch symud eich trwydded i’ch cyfeiriad newydd drwy ddiweddaru eich manylion ar lein.

Os ydych wedi symud i gartref gofal preswyl

Os ydych dros 75 oed ac yn byw mewn cartref gofal preswyl, fe allech gael eich trwyddedu gan Drwydded Deledu ARC (Llety ar gyfer Gofal Preswyl) a fydd dim rhaid i chi dalu am drwydded hyd yn oed os nad ydych yn derbyn Credyd Pensiwn. Dylech siarad â gweinyddwr eich cartref gofal.

Unrhyw gwestiynau eraill?

Alla i wneud cais am drwydded am ddim dros y ffôn?

Os byddai’n well gennych wneud cais am Drwydded Deledu am ddim dros y ffôn, ffoniwch 0300 790 6042* a siarad ag un o’n cynghorwyr (mae ein llinellau ar agor rhwng 8.30am a 6.30pm o ddydd Llun i ddydd Gwener).

Beth yw Credyd Pensiwn?

Mae Credyd Pensiwn yn fudd-dal sydd ar gael i bensiynwyr ar incwm isel. Mae ar wahân i bensiwn y wladwriaeth.

Fe allech fod yn gymwys hyd yn oed os oes gennych bensiwn, cynilion neu’n berchen ar eich cartref. Mae’n helpu hefyd gyda chostau tai, biliau gwresogi, treth cyngor, gofal deintyddol ar y GIG a mwy.

Mae’r Drwydded Deledu am ddim i bobl dros 75 oed yn gymwys i’r rhai sy’n derbyn y naill ran neu’r llall o Gredyd Pensiwn – Credyd Gwarant neu Gredyd Cynilion (neu’r ddau).

Mae’n hawdd gweld a allwch gael Credyd Pensiwn. Ffoniwch yr Adran Gwaith a Phensiynau ar 0800 99 1234 (oriau agor 8.00am - 6.00pm) neu ewch i gov.uk/credyd-pensiwn.

Os ydych yn byw yng Ngogledd Iwerddon, ffoniwch Ganolfan Bensiynau Gogledd Iwerddon ar 0808 100 6165. Neu ewch i nidirect.gov.uk/pension-credit.

Sut mae cael gwybod a wyf yn derbyn Credyd Pensiwn yn barod?

Gallwch edrych ar eich cyfriflen banc neu gymdeithas adeiladu lle bydd yr Adran Gwaith a Phensiynau yn talu eich budd-dal. Fe ddylech weld eitem gyda’ch Rhif Yswiriant Gwladol wedi’i ddilyn gan y llythrennau “PC”.

Yn ogystal, bydd yr Adran Gwaith a Phensiynau wedi anfon llythyr hawlio atoch sy’n dangos eich cyfradd newydd o Gredyd Pensiwn sy’n daladwy.

A yw lwfans gweini yn fy ngwneud yn gymwys i gael Trwydded Deledu am ddim?

Ar hyn o bryd, nid yw lwfans gweini yn eich gwneud yn gymwys i gael Trwydded Deledu am ddim.

Mae consesiynau ar ffi’r Drwydded Deledu ar hyn o bryd ar gael i bobl dros 75 oed sy’n derbyn Credyd Pensiwn, pobl sy’n ddall neu â nam difrifol ar eu golwg, pobl sy’n byw mewn gofal preswyl cymwys, a busnesau sy’n cynnig llety dros nos, fel gwestai.

Beth os oes mwy nag un person dros 75 oed yn byw yn fy nghyfeiriad?

Mae un drwydded yn trwyddedu eich prif gartref, ni waeth pwy sy'n byw yno. Felly dim ond un ohonoch sydd angen gwneud cais am Drwydded Deledu am ddim.

A fydd fy Nhrwydded Deledu am ddim yn trwyddedu pobl o dan 75 oed yn fy nghyfeiriad?

Bydd. Bydd eich Trwydded Deledu am ddim hefyd yn trwyddedu unrhyw un o dan 75 oed sy'n byw yn eich prif gyfeiriad, hyd nes y daw'r drwydded i ben.

Mae gen i Drwydded Deledu am ddim, a gaf i hawlio ail drwydded am ddim ar gyfer fy nghartref gwyliau?

Na chewch. Does dim hawl gan unrhyw un sydd â Thrwydded Deledu am ddim yn eu prif gyfeiriad i gael trwydded arall am ddim ar gyfer unrhyw gyfeiriad arall.

Os oes angen trwydded, prynwch un nawr.

A yw'r Drwydded Deledu am ddim yn mynd i gael ei dileu?

Nac ydy, mae’n dal yn bosib cael eich Trwydded Deledu am ddim os ydych dros 75 oed a’ch bod chi, neu rywun sy’n byw yn yr un cyfeiriad, yn derbyn Credyd Pensiwn.

Mae consesiynau eraill ar gael:

• Os ydych yn byw mewn gofal preswyl cymwys
• Os ydych yn ddall neu â nam difrifol ar eich golwg
• Os ydych yn berchen ar fusnes sy’n darparu llety dros nos.

Gallwch wneud cais am Drwydded Deledu am ddim ar lein neu ffonio 0300 790 6042.

A oes Trwydded Deledu am ddim i bobl dros 60 oed?

Does dim Trwydded Deledu am ddim i bobl dros 60 oed. Mae Trwyddedau Teledu am ddim ar gael yn unig os ydych dros 75 oed a’ch bod chi, neu rywun sy’n byw yn yr un cyfeiriad, yn derbyn Credyd Pensiwn.

Os bydd angen unrhyw gymorth arall arnoch, edrychwch ar y ffyrdd o gysylltu â ni (yn Saesneg).

 

†Ffynhonnell: Yr Adran Gwaith a Phensiynau – Awst 2022