TV Licensing

Pan fydd ein Swyddogion yn ymweld ag eiddo, byddan nhw: 

• Yn dangos eu cerdyn adnabod. Os byddwch chi’n gofyn, byddan nhw hefyd yn rhoi rhif ffôn i chi er mwyn i chi allu ffonio a chadarnhau’r manylion ar eu cerdyn.
• Yn esbonio’r rhesymau dros yr ymweliad 
• Yn gwrtais ac yn deg 
• Yn dilyn y gyfraith a’r holl reoliadau a pholisïau 
• Yn osgoi defnyddio bygythiadau o unrhyw fath 
• Yn parchu eich hawl i breifatrwydd a chyfrinachedd 
• Dim ond yn dod i mewn i’ch eiddo os ydych chi’n rhoi caniatâd iddyn nhw, oni bai fod gwarant chwilio wedi’i chyhoeddi 
• Yn cofnodi’r cyfweliad os oes angen ac yn gofyn i chi lofnodi i gadarnhau bod eu nodiadau’n gywir 
• Yn gwneud yn siŵr bod y person sy’n cael ei gyfweld yn gwybod beth fyddai’n gallu digwydd o ganlyniad i wylio neu recordio unrhyw deledu byw neu BBC iPlayer heb Drwydded Deledu 
• Yn gadael os byddwch yn gofyn iddyn nhw wneud hynny, oni bai fod gwarant chwilio wedi’i chyhoeddi 
• Pan fydd angen, yn defnyddio offer canfod neu’n gwneud cais am warant chwilio os ydyn nhw’n credu bod rhywun yn yr eiddo yn troseddu 

Os oes angen i chi wneud cwyn 

Rydyn ni’n defnyddio llawer o fesurau i wneud yn siŵr bod ein Swyddogion yn gwneud eu gwaith yn briodol. Mae hyn yn cynnwys edrych ar adborth gan bobl sydd wedi cael ymweliad. Os byddwn yn cael cwyn, byddwn yn ymchwilio ac yn cymryd camau gweithredu lle bo angen. 

Gwybodaeth am sut mae cwyno

Rheolau cofnodi cyfweliad

Mae Swyddogion yn cael cyfweld person os ydyn nhw’n credu neu’n amau ei fod wedi troseddu o dan Ddeddf Cyfathrebiadau 2003 – ond dim ond ar ôl rhoi rhybuddiad i’r person.

Mae hyn yn cyd-fynd â Deddf yr Heddlu a Thystiolaeth Droseddol 1984 yng Nghymru a Lloegr, neu’r ddeddf gyfatebol mewn mannau eraill. 

Bydd Swyddog yn cymryd manylion y sawl sy’n cael ei gyfweld, yn gofyn am gael archwilio’r derbynnydd teledu, ac yn cofnodi popeth sy’n cael ei ddweud o dan rybuddiad yn ysgrifenedig.

Does dim rhaid i’r sawl sy’n cael ei gyfweld adael i’r Swyddog ddod i mewn i’w eiddo na dweud unrhyw beth. Gall ofyn am gael siarad â chyfreithiwr a gwrthod llofnodi’r cofnod o’r cyfweliad. Gall hefyd ofyn am gael newid y cofnod os yw’n anghytuno ag unrhyw beth cyn ei lofnodi.